WASHINGTON.- Korte supremo, e korte di mas haltu na Merka a mantené e desishon di presidente merikano Donald Trump, kontra entrada di siudadanonan di shete pais. Esaki ta un viktoria grandi pa e presidente merikano. Awor ku korte supremo a mantené e desishon di e presidente ta nifiká ku outoridatnan merikano por ninga entrada na Merka di siudadanonan di paisnan islamítiko i tambe di algun pais mas.
Ta sinku di e nuebe wesnan a vota na fabor di mantenshon di e prohibishon. E paisnan afektá ku e desishon aki ta primordialmente nort Korea, Siria, Iran, Libia, Jemen, Venezuela i Somalia. Korte Supremo a hasi un evaluashon di e medida despues di vários partido a reklamá ku ta trata di un medida ku ta kontra leinan aktual. E korte ku ta dominá pa wesnan republikanonan konservativo, esnan ku tin krítika kontra di e medida no a presentá ku sufisiente prueba bálido. Segun e wesnan aki, e medida no ta praktiká deskriminashon a base di religion.
Presidente Trump den un promé reakshon a bisa ku esaki ta un tremendo viktoria pa pueblo merikano i pa e konstitushon merikano.
