CARACAS, AP.- Pinturanan di eks presidente Hugo Chavez ku añanan atras a bria entre e kolonan fresku i bibu na muraya di kapital, awe ta lusi gasta i te asta ku dibuhonan riba nan enfatisando asina riba e krísis ku ta asota Venezuela.
Na seis aña di su morto, Chavez ta sigui laga sentimentunan mei mei di venezolanonan; algun ta kord’e komo un tata di un revolushon ku a saka mayoria pober di sektornan, miéntras ku otronan ta responsabilis’é pa e krísis profundo i largu ku ta asotá e pais suramerikano aki.
E gobièrnu tabata preparando ayera pa otro aniversario di e fayesementu di Chavez den un pais ku un aktual krísis ekonómiko profundo i mei mei di tenshonnan debí na e situashon entre oposishon i presidente Nicolas Maduro pa preshoná su salida di poder i komienso di su di dos temporada di gobernashon.
E aktonan lo tuma lugá den museo di kuartel di Montaña, den e kapital kaminda Chavez a keda dera despues di a muri dia 5 di mart 2013 den un hospital militar den kapital despues di a kombatí pa kasi dos aña un kanser ku e tabatin pero ku ainda e detayenan di esaki ta deskonosí.
Retnan sosial tabata esenario ayera di e polarisashon ku tin relashoná ku Chavez. Miéntras organismonan estatal, kuerponan militar i siguidónan di e gobièrnu ta rekordá e morto di e mandatario ku video, potrèt i menshonnan emoshonal bou di su etikèt di #6anjosDeamorylealtad”, algun opositor ta usa Twitter pa fustigá i insult’é.
Despues di morto di Chavez hopi kos a kambia na Venezuela. E movementu Chavista, un di esnan mas grandi yega na e lider ku a fayesé, awe ta mustra debilidat pa e afekto di malkontentu ku e krísis a generá i pa e divishonnan interno ku a surgi entre e esnan ku ta sigui Maduro i esnan ku ta enfrentá abiertamente e mandatario i ta akus’é di traishon di ideanan di Chavez i pone na riesgo e futuro di e proseso di gobernashon.
