NASHON UNI, AP.- Diferente pais a reuní aña pasá, pa determiná kon ta bai lidia ku e kantidat kresiente di venezolanonan ku ta migra pa otro paisnan. Diferente nashon latinoamerikano a bolbe ekspresá nan preokupashon den Nashon Uní i debatí tokante e mesun problema.
Perú, Ecuador i Colombia entre otro, a reuní ku Federica Mogherini, e Representante di Union Europeo pa Eksterior, pa pidi mas yudansa finansiero i koperashon pa asina atendé ku e yegada di mas di kuater mion venezolano ku a bandoná Venezuela debí na falta di oportunidat den e pais.
“E reto ta grandi, pero nos mester di un akshon kontundente di e komunidat internashonal”, asina e presidente kolombiano Ivan Duque a bisa. “E komunidat internashonal ta wòrdu rekerí pa kontribuí ku mas rekurso, no pa nos estadonan, pero pa esnan ku ta sufriendo komo konsekuensia di e régimen diktador di presidente Nicolás Maduro den e pais”.
