BEIRUT, LIBANO, AFP.- Líbano a firma un petishon pa haña yudansa finansiero di Fondo Monetario Internashonal, inisiando un proseso largu ku finalmente lo suavisá e pais su krísis ekonómiko.
“Promé Minister Hassan Diab i Minister di Finansa Ghazi Wazni a firma un petishon pa haña yudansa di FMI”, segun indikashon di gobièrnu. Esaki a sosodé un dia despues ku e pais a anunsiá ku lo pidi e organisashon yudansa.
Líbano ta pasando dor di su krísis ekonómiko di mas grave desde e guera sivil di 1975-1990.
E ‘lockdown’ pa kombatí propagashon di e Coronavirus a simplemente empeorá e pais su situashon ekonómiko, kual ta inkluí inflashon, e moneda i e debe soberano di e pais.
E pais a aprobá un plan di reforma ekonómiko unánimemente djaweps durante un reunion di gabinete, kual segun pronóstiko lo redusí Líbano su debe públiko di 170% pa ménos di 100%.
No ta evidente kuantu FMI lo kontribuí kuné. Ekspertonan a bisa ku solamente un reskate di FMI lo saka Líbano for di e situashon ku e ta aden.
Kuarentisinku porshento di e pueblo di Líbano ta biba bou di e liña di pobresa. Ademas vários a pèrdè trabou òf risibí ménos pago.