CARACAS, AP.- E lider opositor Juan Guaidó a yega Venezuela despues di un gira internashonal di kasi tres siman ku el a realisá den Merka i Europa pa reforsá su aliansa ku gobièrnunan aliado.
E hefe di Asamblea Nashonal a anunsiá riba su kuenta di Twitter ku “Nos a yega Caracas. Mi tin e kompromiso di un mundu liber, dispuesto na yuda nos rekuperá nos Demokrasia i Libertat”.
E opositor a yega den un buelo di e liña portugues TAP desde Lisboa.
E regreso a sosodé un dia promé ku loke a wòrdu planiá kaminda Guaidó a anunsiá ku “mi ta bolbe bèk ku e kompromiso di nos aliadonan, ku e akshon i medidanan ku nan lo ehekutá”.
Guaidó a inisiá e biahe riba 19 di yanüari kual a inkluí bishitanan na Bogotá, London, Paris, Bruselas, Madrid, Ottawa i Washington pa reforsá su relashon ku mas di 50 pais ku a rekonos’é komo hefe di Asamblea Nashonal i presidente interino di Venezuela. Su último aparishon den ku prensa tabata 5 di febrüari, na momentu ku el a reuní ku Donald Trump na Kas Blanku.
