LONDON, AP.- Un tribunal eskoses a bisa djárason ku e plannan di Promé Miniser Boris Johnson pa suspendé Parlamento ta un intento ilegal pa evitá un votamentu demokrátiko relashoná ku Brexit. Falta ménos di dos luna pa Reino Uní bandoná Union Europeo.
E gobièrnu a bisa mesora ku lo apelá e desishon, miéntras ku oposishon ta eksihí pa Johnson revoká e suspenshon i permití ku e legisladornan ta regresá den Parlamento.
E desishon di korte a kontribuí na e stankamentu polítiko ku Gran Bretaña ta pasando aden, miéntras falta 50 dia pa Brexit tuma lugá. Johnson kier pa e pais bandoná Union Europeo riba 31 di òktober, ku òf sin un akuerdo. Pero mayoria legislador ta teme ku un Brexit sin akuerdo lo tin un efekto devastador pa e ekonomia britániko i ta desidido pa para e promé minister aki su intenshonnan.
Segun e hues di Eskosia, na Edimburgo, e medida di gobièrnu ta ilegal “dor ku e propósito tabata pa opstakulisá Parlamento”. E tribunal a diktaminá ku e desishon di e siere temporal ta “nulo i sin efekto”.
