CARACAS, VENEZUELA, AFP.- E presidente di Venezuela, Nicolás Maduro a pronostiká djamars ku e pais karibense ta kla pa inisiá un vakunashon masivo kontra COVID-19 kuminsando aprel 2021.
E gobièrnu sosialista a bisa ku a baha e kurva di infekshon na Venezuela. E pais di 30 mion habitante tin 95.149 kaso konfirmá i 830 morto komo kousa di e Corona vírus nobo, segun sifranan ofisial.
Organisashonnan manera Human Rights Watch ta kuestioná e sifranan ofisial indikando ku kisas gobièrnu ta skondiendo un situashon muchu mas pió.
Maduro a afirmá den òktober ku e vakunashon lo kuminsá entre desèmber i yanüari, sperando riba vakunanan di Rusia i China, e dos sostennan internashonal prinsipal di e pais.
