BARCELONA, AP.- Míles di partidario di independensia katalan, furioso paso e gabinete spañó a reuní na Barcelona, a blòkia rutanan djabièrnè i konfrontá ku polis antimotin riba kayanan di e kapital regional.
Por lo ménos 11 manifestante a wòrdu arestá i desena mas a resultá herida den e konfrontashonnan, segun indikashon di polis regional Mossos d’Esquandra na momentu ku e reunion a terminá.
E gobièrnu sentroiskierdista spañó a anunsiá un serie di medida, manera anulashon di un sentensia ku a kousa ehekushon di un eks presidente katalan, i obranan di infrastruktura pa e region, inkluyendo un oumento den e salario mínimo nashonal den e último kuater dékadanan.
Algun manifestante a konfrontá ku polis antimotin riba kaya, furioso pa e presensia di premier Pedro Sanchez den e siudat.
E gobièrnu regional, forma pa un koalishon di partido separatista, a pidi e pueblo pa protesta pasifikamente apesar di un akuerdo ku outoridat sentral pa buska un salida di e krísis polítiko andando desde e intento frakasá di independensia aña pasa.
Despues di su enkuentro djaweps, e segundo desde ku ámbos a yega na poder algun luna pasa, Sanchez i presidente regional Quim Torra a publiká un komunikado konhunto di e diálogo pa resolvé e konflikto tokante e futuro di Catalonia.
Sanchez, kende a heredá a krísis katalan na momentu ku el a provoká kaida di su predesesor den yüni, a duna prioridat na un mehorashon di e relashonnan ku e region próspero. Pero su gobièrnu minoritario ta enfrentá oposishon di gruponan konservador ku ta eksihí elekshon antisipá.
Apesar di e avansenan aparente di djaweps, djabièrnè tabatin deskonfiansa atrobe. Polis regional a wòrdu reforsá ku sentenar di agentenan antimotin di polis nashonal.
Televishon a transmití e kaminata di Sanchez desde su hotèl te na sede di e reunion ku presensia polisial fuerte.
Un multitut di manifestante a ekspresá nan malkontentu kontra e presidente. Pa mèrdia tabatin konfrontashonnan mas fuerte.
