NEW DELHI, AFP.- Mas di 60 mion di hindú por a kontagiá ku e vírus di Corona, esta 10 biaha mas di loke e sifra ofisial ta indiká, asina outoridatnan médiko enkargá ku e pandemia a bisa, sitando un estudio nashonal basá riba e tèst serológiko ku ta midi e antikuerponan.
Segun e sifranan ofisial, India ta konta ku 6,1 mion di kaso entre 1.300 mion di habitante, loke ta hasié e di dos pais mas gòlpia pa e pandemia di mundu, despues di Merka.
Pero análisis di sanger efektuá den 29 mil persona den 21 estado di e pais entre mei mei di ougùstùs i mei mei di sèptèmber ta mustra ku e kantidat di persona kontagiá por ta muchu mas.
“E konklushon prinsipal ta den e investigashon serológiko ku ta bisa ku un di kada 15 persona di mas di 10 aña tabata eksponé na ougùstùs” na e vírus, asina Balram Bhargava direktor general di konseho indio di investigashon médiko a bisa durante di un konferensia di prensa di ministerio di salú.
E resultadonan ta señalá ku e eksploshon di e vírus ta muchu mas grandi entre e personanan ku a tuma parti na e pruebanan den barionan pober den e zonanan urbano 15.6% i den e otro zonanan urbano 8,2% ku den regionnan rural 4.4%.
