SEUL, SURKOREA, AP.- E sekretario di Defensa di Merka, Jim Mattis, a deklará djaweps na Surkorea ku Washington lo mantené su kantidat aktual di sòldat den e península di Korea, sin importá ku e negosiashonnan nuklear ku Norkorea ta sigui.
Papiando huntu ku e minister surkoreano di defensa Song Young-moo, Mattis a lesa un deklarashon largu kaminda el a reiterá e kompromiso merikano ku Seul a agregá ku “Merka lo sigui usa su kapasidatnan diplomátiko i militar pa mantené e kompromiso aki”.
Su mensahe tabata parse di ta dirigí pa kalma temor ku Merka lo saka su sòldatnan di e península, un posibilidat ku a haña impulso na momentu ku presidente Donald Trump a bisa ku e lider norkoreano Kim Jong Un, ta haña un bon idea pa retirá 28.500 sòldat merikano di Surkorea.
Norkorea ta konsiderá e presensia di trupanan merikano den e península komo un menasa. E presensia aki ta konsekuensia di e Guera di Korea di 1950-1953, kual a terminá sin un akuerdo di pas. Forsanan merikano lo realisá maniobranan regular konhunto na gran eskala ku Surkorea. Norkorea ta bisa ku e entrenamentunan ta un preparashon pa un invashon.
