WASHINGTON, AP.- Merka a kanselá un tratado di 1995 ku Iran djárason. E tratado a establesé relashonnan ekonómiko i derechi konsular entre ámbos nashon, despues ku e tribunal máksimo di Nashon Uní a ordená Washington pa suspendé e sanshonnan ku el a pone kontra Iran i ku ta afektá vienes humanitario.
E medida ta simbóliko en realidat, pero esaki ta pone énfasis riba e deterioro grave di relashon entre e dos paisnan.
E sekretario di Estado merikano, Mike Pompeo, a bisa na periodistanan djárason ku e terminashon di e Tratado di Amistat di 1955 mester a wòrdu hasí basta dia kaba i ku Iran a presentá un denunsia “sin base” den Korte Internashonal di Hustisia kontra e sanshonnan. E argumento pa esaki ta ku e sanshonnan ta violá e tratado.
E iranínan ta violando e akuerdo “desde basta tempu kaba” i “nos mester a kanselá esaki vários dékada pasá”, segun Pompeo.
E minister di Eksterior di Iran, Mohammad Javad Zarif, a elogiá e desishon di korte internashonal. “Esaki ta un frakaso mas di e gobièrnu merikano kual ta adikto na sanshon” i un “viktoria pa e hustisia”.
E tratado a wòrdu firmá na momentu ku Merka i Iran tabata aliado, despues di e revolushon di 1953 influensia pa Gran Bretaña i Merka i ku al final a habri kaminda pa e régimen di Sha Mohamad Reza Pahlavi.
