MERKA, AP.- Reguladornan merikano a aprobá e promé droga djabièrnè, krea spesífikamente pa redusí transpirashon eksesivo, un kondishon komun ku por kousa angustia i afektá bida sosial di e persona.
FDA a aprobá e remedi Qbrexza kontra sodamentu eksesivo bou di brasa, kual lo sali na benta den òktober.
E remedi aki ta den forma di un paña, kual mester wòrdu apliká diariamente riba e kueru pa asina blòkiá e aktivashon di e glándulanan ku ta produsí sodó bou di brasa.
E fabrikante, Dermira Inc., a ninga di revelá e preis, manera e empresanan aki ta hasi normalmente.
Segun kalkulashonnan, mas o ménos 15,3 mion merikano ta padesé di transpirashon eksesivo, pero apénas un di kada kuater ta rekerí tratamentu. E tratamentunan aktual ta inkluí inyekshon di Botox, operashon di e glándula, laser i otro artefaktonan i droga aprobá pa otro trastornonan ku ta blòkiá e mensaheronan kímiko di e organismo pa redusí e produkshon di sodó riba e kurpa kompleto.
E efektonan kolateral di Qbrexza ta inkluí vishon limitá, konstipashon, kueru ku ta pika, doló di kabes òf garganta, boka, wowo i kueru seku.