DEN HAAG, HULANDA, AFP.- Merka ta kompletando destrukshon di su último arsenal di armanan kímiko, di kual dos a keda, segun informashon di Organisashon pa Prohibishon di Armanan Kímiko.
Funshonarionan merikano a hasi e anunsio den un reunion di dos dia ku a tuma lugá siman pasá den sede di e organismo internashonal na Den Haag, segun OPAQ.
E arsenalnan kímiko a wòrdu destruí den un serie di instalashon spesialmente konstruí na Blue Grass, na Richmond, kaminda ta warda armanan kímiko.
“E inspektornan di OPAQ ta supervisá i verifiká progreso di e destrukshon 24 ora pa dia”, asina OPAQ a añadí den un komunikado.
Te ainda Merka a destruí 97,65% di su armanan kímiko di kategoria 1, kual ta un di e kategorianan di mas peligroso. Tur arma di kategoria 2 i 3 ya a wòrdu destruí.
Presidente merikano, Joe Biden, a atvertí siman pasá ku un atake kímiko na Ukrania, invadí pa Rusia na fin di febrüari ta un menasa kreibel. Rusia ta miembro di OPAQ i a bisa ku e pais no tin un arsenal kímiko militar. Pero e pais a haña preshon pa ta mas transparente pa ku su uso di armanan tóksiko.
