MEXICO, AFP.- Mexico a ofresé ayera asilo polítiko na e fundadó di WikiLeaks, Julian Assange despues ku hustisia britániko a rechasá su ekstradishon pa Merka pa e keda husgá pa publikashon di míles di dokumentonan sekreto.
“Mi ta bai pidi e sekretario di relashonnan eksterior pa e hasi e trámitenan korespondiente pa pidi gobièrnu di reino uni e posibilidat pa Assange por haña libertat i ku Mexico ta ofresé asilo polítiko”, segun e presidente Andres Manuel Lopez Obrador den un konferensia di prensa.
E mandatario iskierdista a selebrá e desishon di hustisia britániko i a mustra di ta na fabor pa Assange keda librá. “Ta un triunfo di hustisia pasobra Assange ta un periodista i e meresé un oportunidat”, asina el a indiká.
Lopez Obrador a aklará ku Mexico ta ofresé asilo ku protekshon, pero tambe ku e responsabilidat di ku esun ku haña esaki no ta referí den asuntunan polítiko di niun pais.
Un e hues britániko ayera a rechasá e ekstradishon di Assange pa Merka ora el a konsiderá ku si e hasié, e por suisidá su mes.
“Mexico tin un historia largu den asilo, na momentu di a demostrá esaki den konfliktonan di guera sivil spañó, ku e eks presidente boliviano Evo Morales na 2019 i otro aktonan” segun Adolfo Laborde a bisa.