SIUDAT DI MEXICO, AP.- E supsekretario di Salú di México a anunsiá djabièrnè ku e pais tin dos kaso konfirmá di e vírus nobo, miéntras presidente Andres Manuel Lopez Obrador a purba minimisá e gravedat di e COVID-19 bisando ku “e no ta ni ekivalente na influenza”.
E supsekretario di Salú, Hugo Lopez-Gatell a afirmá ku un di e pashèntnan ta den e kapital i e otro den estado na nort di Sinaloa. Ningun di e dos kasonan ta grave.
Por lo ménos sinku miembro di famia di e promé pashènt a wòrdu poné den karentena. Lopez-Gatell a bisa ku un di e hòmbernan tabatin kontakto ku un persona ku a biaha den un region na nort di Italia kaminda e brote a sosodé.
Grip normal ta mata mas hende dor ku e ta afektá mas hende, pero e vírus nobo tin un tasa di mortalidat muchu mas haltu.
Lopez Obrador a bisa ku su funshonarionan lo realisá un konferensia relashoná ku coronavirus tur anochi. Lopez-Gatell a bisa ku e pueblo mester pone e kustumber tradishonal di saludá otro ku man, brasa i sunchi un banda por lo pronto.
