PANAMA CITY, FLORIDA, MERKA, AP.- Ekiponan di reskate tabata buska personanan pegá entre ruinanan djaweps despues di orkan Michael na nort di Florida. Lus di dia a revelá e berdadero daño di kasnan destruí pa e terser orkan mas poderoso ku a asotá e teritorio di Merka.
Por lo ménos dos morto a wòrdu atribuí na Michael, kual ounke redusí na tormento tropikal a sigui asotá ku bientu i áwaseru mas intenso, vários zona na sùitost di e pais, kual ainda no a kaba di rekuperá di orkan Florence luna pasá.
Bou di shelu kompletamente kla, e refugiadonan a sali i topa ku e panorama deskonosí di kas i sentronan komersial afektá.
Mas di 900.000 kas i negoshi na Florida, Alabama, Georgia i Carolinas no tabatin elektrisidat.
“Awe mainta, kosta di Golfo di Mexico, Panhandle i big Bend a topa ku un esenario destruktivo inimaginabel”, asina e gobernador Rick Scott a bisa. “Mayoria bida a wòrdu alterá pa semper. Mayoria famia a pèrdè tur kos. E orkan aki tabata un mònster total”.
Sinembargo, e magnitut berdadero di e dañonan no ta konosí, debí ku algun sitio no tabata aksesibel debí na kaminda kubri ku shushi òf kamindanan inundá.