NEW YORK, MERKA, AFP.- Elon Musk, fundadó di e empresa di outo eléktriko Tesla i SpaceX, a menasá ku e lo retirá su oferta pa kumpra Twitter indikando ku e ret sosial no ta kumpliendo ku obligashonnan pa entregá datonan tokante kuentanan falsu, segun un dokumento ofisial.
Twitter a keda “sin kumpli” ku su “obligashonnan bou di e akuerdo di kompra i Musk tin derechi di no kontinuá ku e transakshon i terminá e akuerdo di kompra”, segun un karta dirigí.
E plataforma a señalá den un mensahe na AFP ku a kompartí tur informashon ku Musk, konforme e akuerdo firmá. I tin intenshon di kompletá e operashon.
Despues di un oferta pa kumpra e ret sosial pa 44.000 mion dòler, na vários okashon Musk a kuestioná e datonan ku Twitter a entregá tokante kuentanan falsu i medidanan adoptá pa limitá un oumento di esaki.
Pero ta promé biaha ku e ta pone su preguntanan den un dokumento ofisial.
