KIEV, UKRANIA, AFP.- NATO a anunsiá djadumingu ku lo entregá mas arma pisá na Ukrania.
Ekiponan di reskate ta trahando pa haña sobrebibientenan entre ruina di un edifisio na Dnipro, na ost di Ukrania kual a keda ataká un dia promé provokando por lo ménos 30 morto.
E sekretario general di NATO, Jens Stoltenberg, a bisa djadumingu ku Putin a balotá forsa di su propio trupanan. “Nos ta den un fase desisivo di e guera, p’esei ta importante pa nos entregá e armanan ku Ukrania mester”, asina el a agregá.
Ukrania a pone hopi preshon insistiendo pa haña armanan pisá, inkluyendo tankinan, pero Oksidente ta kouteloso pa manda esaki pa motibu ku e paisnan no ke ta direktamente involukrá den e guera òf provoká Rusia.
Sinembargo, desde komienso di e luna aki, Fransia, Alemania i Merka a primintí ku nan lo manda tankinan franses AMX-10 RC, 40 vehíkulo di transporte pa sòldatnan aleman i 50 vehíkulo bulletproof merikano.
Reino Uní a primintí djasabra ku e lo manda 14 tanki Challenger 2 pa Ukrania, kombirtiendo e den e promé pais ku ta manda e tipo di material pisá aki.
Rusia a reakshoná riba e anunsio segurando ku e desishon ta simplemente “intensifiká” e konflikto. “generando mas víktima”.
