BAGHDAD, IRAK, AFP.- Parlamento irakí no a logra skohe un presidente djárason, despues di a purba tres biaha. E frakaso ta debí na e bòikòt di un koalishon shiita, segun indikashon di fuentenan di parlamento.
“Asamblea a kanselá e seshon”, segun indikashon di parlamento na prensa.
No a publiká un fecha nobo pa un di kuater intento, pero Korte Federal, e instansia hudisial mas importante di e pais, a duna e diputadonan te ku 6 di aprel pa skohe un lider pa Irak.
Un fuente parlamentario a deklará na AFP ku solamente 178 di 319 diputado tabata presente den e seshon di djárason, kual a priva Asamblea di e mínimo di dos terser parti di e votonan nesesario.
Seis luna despues di elekshonnan legislativo antisipá den òktober 2021, Irak no a logra skohe un presidente ni promé minister. E nombramentu di un promé minister ta dependé di elekshon di esun promé.
Tin 40 kandidato den elekshon presidensial. E ganadó mester logra por lo ménos dos terser parti di e votonan.
