SEUL, AP.- Norkorea a menasá djárason di kanselá e kumbre entre su lider Kim Jon Un, i e presidente di Merka, Donald Trump. Esaki ta debí ku e pais no ta interesá den un operashon “unilateral” destiná pa preshoná Pyongyang pa e bandoná su arsenal nuklear.
E atvertensia lansá pa e promé vise minister norkoreano di Eksterior a tuma lugá algun ora despues ku e pais a kanselá un reunion di nivel haltu na Surkorea di forma abrupto, den protesta pa e maniobranan militar konhunto entre ehérsito surkoreano i merikano. Desde vários aña kaba, Pyongyang ta kalifiká e ehersisionan di ensayo aki komo un invashon.
Na Washington, Trump a bisa ku e no tabata sa di e menasa norkoreano di retirá di e diálogo.
E bosero di Kas Blanku, Sarah Huckabee Sanders, a bisa djárason ku e atministrashon Trump “ainda tin speransa” ku e enkuentro ta tuma lugá. El a agregá ku e presidente merikano ta “kla pa algun negosiashon difísil” i ku, si e reunion no tuma lugá, Merka lo sigui “ku e kampaña di preshon máksimo” riba Norkorea.
Beijing a pidi su aliado Pyongyang pa sigui ku su plannan pa e kumbre. E bosero di Ministerio di Eksterior di China, Lu Kang, a bisa ku e dos paisnan mester sigurá ku e enkuentro ta tuma lugá segun loke a wòrdu palabrá i trese “resultadonan positivo”.
