CARACAS, AP.- Meimei di un multitut ku bandera venezolano i gritu kontra presidente Nicolás Maduro, míles di manifestante a subi riba kayanan di Caracas pa purba kibra e respaldo di militarnan kontra e desishon di gobièrnu pa no permití entrada di yudansa humanitario den e pais.
“Nos ta sigui te ora nos logra liberá Venezuela”, asina e hefe di Asamblea Nashonal i lider opositor Juan Guaidó a bisa, sigurando ku oposishon lo keda protestá riba kaya te ora Maduro renunsiá. “E presidente ilegítimo aki mester bai, si òf si”, asina el a agregá.
Guaidó, kende a deklará presidente interino di Venezuela den yanüari i wòrdu rekonosé pa diferente pais, a anunsiá ku lo kuminsá hinka e entrega humanitario den e pais. Durante e próksimo fin di siman, nan lo realisá asambleanan boluntario pa definí e proseso pa haña e entrega humanitario ku ta warda na Colombia. Tin unu mas den e pueblo brasilero di Roraima.
E dirigente no a presisá kon lo hinka e yudansa humanitario den e pais, “pero esaki lo drenta si”.
Washington a enkabesá un serie di akshon pa Maduro su renunsia i realisashon di elekshon liber i transparente den e pais. Kas Blanku a aprobá sanshon adishonal kontra e korporashon petrolero, kual ta e generadó di divisa mas prinsipal pa e pais.
