SYDNEY, AP.- Oustralia a disidí pa rekonosé wèst Herusalèm formalmente komo kapital di Israel, pero lo no trasladá su embahada pa e zona aki te na firmamentu di un akuerdo di pas ku e palestinonan. Asina e promé minister Scott Morrison a anunsiá djasabra.
E gobernante a bisa den un diskurso ku Oustralia lo rekonosé Herusalèm oriental komo kapital palestino na momentu ku e partinan yega na un akuerdo komo rekisito di un solushon ku ta inkluí kreashon di e dos estadonan. E embahada lo keda na Tel Aviv te na momentu ku e akuerdo sosodé, asina el a aklará.
Ounke a kanselá e traslado di e sede diplomátiko, Morrison a indiká ku su gobièrnu lo establesé un ofisina di defensa i komersio na Herusalèm i lo kuminsá un buska un tereno adekuá pa su sede diplomátiko.
El a agregá ku e desishon ta respetá e kompromiso pa establesimentu di dos estado i e resolushonnan pertinente di Konseho di Seguridat di Nashon Uní.
Ku e anunsio aki, Oustralia ta kombertí den e terser pais ku ta rekonosé Herusalèm komo kapital di Israel, despues di Merka i Guatemala.
Sinembargo, ta posibel ku e desishon no ta satisfasé e partinan kompletamente. Kompará ku e gobièrnunan oustraliano anterior, esun aktual a rekonosé solamente e zona wèst di e siudat.
Morrison a insinuá ku Oustralia por sigui e pasonan di Merka, kual ta reubikashon di su embahada di Tel Aviv pa Herusalèm, pero mayoria oustraliano ta konsiderá esaki un maniobra polítiko. E krítikonan a deskribí e medida komo un intento pa haña voto durante elekshon parsial den luna di òktober i asina haña un asiento na Sydney, e siudat tin un pueblo hudiu enorme.
