BRUSELAS, BELGIKA, AFP.- Paisnan di Union Europeo manera Bèlgika, Ulanda, Islandia i Repúblika Cheko a anunsiá djamars ku lo ekspulsá desénas di diplomátikonan ruso sospechoso di spionahe, komo kousa di e guera di Rusia den Ukrania.
Bèlgika a disidí ku lo saka 21 persona ku ta traha pa e embahada i konsulado ruso, sospechoso di ta impliká den “operashonnan di spionahe i influensia ku ta un menasa pa seguridat nashonal”, segun indikashon di e minister di eksterior belga, Sophie Wilmes.
E minister a publiká e anunsio riba Twitter kual el a hasi dilanti un komishon di parlamento belga, i kaminda el a bisa ku tur esnan afektá mester bandoná Bèlgika den 15 dia.
Irlanda a anunsiá ku lo ekspulsá kuater diplomátiko ruso i Ulanda anunsiá ku lo saka 17 diplomátiko ruso, segun indikashon di e minister di Eksterior. E ekspulshonnan aki ta un medida di seguridat nashonal, segun e minister a bisa.
Repúblika Cheko a bisa ku un diplomátiko ruso na Praga a haña 72 ora pa sali for di e pais. E bosero di diplomasia di Rusia a bisa ku e pais lo reakshoná riba e ekspulshonnan aki segun “e prinsipio di resiprosidat”.