BUENOS AIRES, ARGENTINA (AFP).- Senadornan di Argentina, sin debate i den votashon ku mannan na laria, lo oumentá nan salarionan ku 170%, den un desishon ku ayera a generá polémika den un pais ku ta den un krísis ekonómiko, ku 288% di inflashon i mas di mitar dje poblashon den pobresa.
Despues dje votashon, ku a tuma lugá na final di un seshon ordinario i ku a dura ménos ku dos minüt, e 72 integrantenan dje kámara lo kobra 4 mion peso (US$ 4.500) nèto pa luna miéntras ku e salario mínimo aktual ta di 200.000 peso (US$ 230).
E blokenan di oposishon a vota na fabor, miéntras ku e senadornan ofisialista i nan aliadonan no a hisa man, ounke nan a duna quorum pa e votashon i nan no a pidi pa vota nominalmente, loke ta un práktika na momento ku no tin konsenso.
“Ta un lokura pasobra e no ta korespondé na e
salarionan ku nos tin”, segun Gabriela Quiroga, un bendedó di paña di 31 aña kende a bisa ku “negoshinan no ta bendiendo nada” i “kada bes nos tin mas tantu hende ku ta drumi riba kaya”.
For di momento ku e notisia a bira konosí, e presidente Javier Milei a kompartí publikashonnan den kua e ta kalifiká e parlamentarionan komo “sínikonan” i “hipókritanan”, miéntras ku e minister di ekonomia, Luis Caputo, a skirbi riba X: “Ta algu inoportuno i di nivel hopi abou na e momento aki teniendo kuenta ku e situashon den kua nos sosiedat ta biba”.
Un dje parlamentarionan mas fuerte kontra dje gobièrnu ta Martin Lousteau, presidente dje partido opositor Unión Cívica Radical, kende pa vota a hisa su man na mitar. Un shòt di esei a keda kompartí mas di 20 biaha pa Milei riba X.
Lousteau, di su parti, a bisa den un entrevista radial ku e medida a keda sostené pa tur senador i a defendé e oumento: “Un senador tabata kobra un terser parti di loke e bosero presidensial Manuel Adorni ta risibí na salario”.
E siman aki a bira konosí ku e bosero presidensial lo tin rango di sekretario di Estado, ku un salario ekivalente di 3000 dollar, i ku Karine Milei, ruman di Javier i sekretario general di presidensia, lo tin rango ministerial, ganando 4.000 dollar.
