WASHINGTON, MERKA, AFP.- E hefe di diplomasia di Merka, Mike Pompeo, lo reanudá buelonan internashonal suspendé pa e pandemia di Coronavirus pa e por bishita Israel pa sostené e gobièrnu nobo di koalishon, segun indikashon di e Departamento di Estado djabièrnè.
E Sekretario di Estado, defensor firme di Israel, lo reuní ku e promé minister derechista Benjamin Netanyahu i su rival Benny Gantz, kende a bira su sosio na Herusalèm riba 13 di mei.
E atministrashon di presidente Donald Trump ta sostené e plannan di Netanyahu pa aneksá gran parti di Wèst Bank okupá pa Israel desde 1967. E palestinonan a bisa ku e medida lo kaba ku e posibilidat pa un akuerdo di pas riba término largu.
Pompeo kier papia tokante Merka i Israel su esfuersonan pa kombatí e pandemia di COVID-19, inkluyendo e problemanan di seguridat regional relashoná ku e influensia “maligno di Iran”, segun e bosero di Departamento di Estado, Morgan Ortagus a bisa den un komunikado. E komunikado a agregá ku e kompromiso di Merka pa ku Israel nunka no tabata mesun fuerte ku durante liderazgo di presidente Trump.
