KRAMATORSK, UKRANIA, AFP.- Por lo ménos kuater persona a muri i 47 a resultá heridá djamars den un atake ku rakèt ruso ku a alkansá un restorant popular den sentro di Kramatorsk, na ost di Ukrania, segun indikashon di outoridatnan.
“Kuater persona, inkluyendo un mucha muhé di 17 aña, a muri na momentu ku un rakèt a gòlpia e restorant”, segun indikashon di e Fiskal di Ukrania, ku a reportá 42 herido di diferente gravedat na e sitio, inkluyendo un beibi di ocho luna.
E fiskal a menshoná ku e atake ku rakèt ruso a alkansá un área residensial pafó di e siudat, lagando sinku bisiña heridá.
E atake a afektá Ria Pizza, un establesimentu frekuentá pa periodistanan i militarnan den e siudat na ost di Ukrania, e último sentro urbano grandi bou di kontrol di Kiev.
Segun polis di Ukrania, Rusia a lansa dos rakèt di tera-aire S-300.
Un kòki a bisa ku na momentu di e atake “tabatin hopi hende” den e restorant.
Kramatorsk, ta e último sentro urbano grandi bou di kontrol di Ukrania na ost di e pais.
