BRASÍLIA, BRASIL, AFP.- Korte Elektoral di Brasil a reanudá e huisio kontra èks presidente Jair Bolsonaro pa supuesto abuso di poder, ku por keda resolvé e siman aki, lagando e èks mandatario no eligibel komo polítiko pa ocho aña.
Tribunal Superior Elektoral (TSE) ta huzga e lider ultra derechista pa atakenan kontra e sistema di voto elektróniko na Brasil durante un reunion ku embahadornan na yüli 2022, tres luna promé ku el a wòrdu derotá den elekshonnan pa e iskierdista Luiz Inácio Lula da Silva. E seshon di djamars, a kuminsá ku voto di wes Benedito Goncalves, kende ta e promé pa presentá su opinion di e shete miembronan di TSE, ku sede na Brasilia.
Den e promé seshon di e huisio, djaweps último, e ofisina di fiskal a pidi pa deklará e èks mandatario (2019-2022) komo no eligibel pa motibu di “abusu di poder polítiko i uso indebí di medio di komunikashon”.
Segun fiskal, Bolsonaro “a trata di duna e impreshon robes ku e proseso elektoral” na Brasil “ta skur” i suseptibel pa “manipulashon”, ku “intenshon di desakreditá e resultadonan” elektoral.
Den su diskurso dirigí na diplomátikonan na 2022, Bolsonaro a sigurá, sin prueba, ku su meta ta “korigí fayonan” di sistema di urna elektróniko vigente ku “partisipashon di Forsanan Armá”.