PORT-AU-PRINCE, AP.- Ku mas karetera blòkia den e pais kompleto, Haiti a inisiá e di sinku siman di protesta despues ku lidernan di oposishon a bisa ku lo no renunsia nan eksigensia pa e presidente tuma retiro.
Ounke e kapital Port-au-Prince tabata relativamente trankil, e manifestashonnan den otro siudat i lokalidatnan a tuma lugá un dia despues ku míles a marcha den e siudat durante un protesta pasífiko organisá pa artistanan. Diferente grupo empresarial, lidernan eklesiástiko i organisashonnan di derechi humano a uni e petishon pa presidente Jovenel Moise tuma retiro di su kargo komo presidente di e pais. E presidente su oponentenan ta protestando kontra korupshon, inflashon i skarsedat di produktonan básiko, inkluyendo kombustibel.
Empresario Anthony Bennet a partisipá na e protesta. E empresario kier a postulá pa presidensia na aña 2015 i a señalá ku e sektor priva tambe a wòrdu afektá ku faktornan ku ta sigui daña e pais su ekonomia.
