MADRID, AP.- E premio nobèl di Pas, Juan Manuel Santos a primintí di desaroyá e sektor agro alimentisio di Colombia i lucha kontra narkotráfiko komo medidanan básiko pa konstruí pas den su pais.
Santos a dirigí su mes na e akadémikonan diplomátikonan i studiantenan reuní den Universidat Alfonso X el Sabio de Madrid, kaminda el a risibí su título di doctor Honoris Causa.
Ku su distinshon akadémiko máksimo, universidat kier a rekonosé e kontribushon di e mandatario na e proseso di pas kolombiano, meskos ku su logronan den materia di desaroyo sosial i edukashon.
Presidente kolombiano a alkansá e aña aki un akuerdo di pas históriko ku gueria di FARC kual a sòru pa e por haña e premio nobèl di Pas. Ounke e dokumento inisial a keda rechasá despues di un plebisito realisá na òktober, un akuerdo modifiká a keda aprobá pa kongreso kolombiano siman pasá.
Durante di su diskurso na Madrid, Santos a bolbe kòrda e 220 víktimanan i kasi 8 mion militar ku a keda mandá pa e konflikto mas antiguo na Amérika Latina i kual awor a bai di komprometé na traha pa un pas duradero.
“Pas ta impliká promové e desaroyo di e kampo, fortalesé presensia den estado di tur teritorio, amplia demokrasia i fortalesé e partisipashon di e propio komunidatnan”, asina e mandatario a bisa.
“E pas aki ta eksihí kompromiso di konfrontá narkotráfiko i kompañá e kampesinonan pa nan por bandoná e kultivonan ilegal i por traha riba kultivonan legal”, asina el a enfatisá.
