NEW YORK, USA (AFP).- Segun e presidente taiwanes Tsai Ing-Wen, China no tabatin tempu pa purba un invashon di Taiwan pa motibu di otro desafionan interno ku kua Beijing tin ku atendé.
“Mi ta kere ku e lidernan chines na e momento aki ta sintá ku mannan yen pa motibu di situashonnan interno”, segun Tsai a bisa. “Mi ta kere ku awor aki no ta e momento pa nan konsiderá un invashon di Taiwan”, el a agregá.
E entrevista a keda publiká dos siman despues dje kumbre entre e presidentenan norteamerikano i chines na San Francisco, promé ku e kumbre dje paisnan dje foro di Kooperashon Ekonómiko Asia-Pasífiko (APEC).
E enkuentro entre Joe Biden i Xi Jinping tabatin komo meta, partikularmente, pa aliviá e tenshon entre e dos gran potensianan mundial i evitá kualke punto di konflikto. Pero e dos gobernantenan ta sigui ku opinionnan diferente pa loke ta e asuntu di Taiwan. E presidente chines a bisa Joe Biden ku e re-unifikashon dje isla outónomo ku China ta “inevitabel”.
China ta konsiderá Taiwan komo un provinsia rebelde ku ainda no a logra re-unifiká ku e sobrá di su teritorio for di despues di final dje guera sivil den 1949.
Pa e presidente di Taiwan, China ta enfrentá un krísis ekonómiko, finansiero i polítiko ku, segun é, ta alehá e posibilidat di un invashon. Pero nan ta sinti ku ainda Beijing ta buska pa interferí den elekshonnan presidensial ku lo tuma lugá den luna di yanüari próksimo na Taiwan, segun Tsai Ing-Wen.
