ISTANBUL, TURKIA, AP.- Presidente turko Recep Tayyip Erdogan a deklará su viktoria den referèndem di djadumingu, kual ta otorgá mas poder komo presidente. El a kalifiká e resultado aki komo un “desishon históriko”.
E mandatario a deklará dilanti reporteronan na Istanbul ku e resultadonan ofisial a mustra ku “Si” a gana ku un márgen di 1,3 mion voto.
Erdogan a gradisí su votadónan.
“16 di aprel ta un viktoria pa tur esnan ku a bisa si òf no, di tur 80 mion, i tur 780.000 kilometer kuadrat di Turkia”, asina e presidente a enfatisá.
E resultadonan reportá pa agensia estatal di notisia Anadolu a mustra ku kasi 99% di votonan kontra a mustra ku SI a haña 51,3% kompará ku 48,7% di NO.
Erdogan a purba amplia su poder ya pa basta tempu kaba, pero un intento anterior a frakasá despues ku partido gobernante no a haña sufisiente voto pa aprobá reformanan konstitushonal sin realisá un referèndem.
Esnan ku ta oponé na e medida a argumentá ku e plan ta konsentrá poder demasiado den man di un hòmber ku segun nan a mustra tendensianan kresiente di outokrasia.
E resultado lo tin un efekto enorme riba futuro polítiko di Turkia riba término largu i pa ku e pais su relashon internashonal.
Promé minister Binali Yildrim su puesto lo wòrdu eliminá bou di e sistema di gobièrnu presidensial nobo.
