PARIS, AP.- E úniko yu muhé di rei Salman di Saudi Arabia a wòrdu deklará kulpabel komo kómplise di violensia despues ku el a duna su bodyguardnan òrdu pa detené i gòlpia e lotgiter ku a saka potrèt di apartamentu di e famia real saudi na Paris.
Prinsesa Hessa bin Salman no tabata presente den korte na Paris despues ku a lesa e veredikto i sentensiá pa vários akusashon. Tribunal a sentensi’é na 10 luna di prizòn suspendé i el a haña un but di 10.000 euro, un kastigu mas fuerte di loke fiskal a pidi.
E fiskalnan a argumentá ku e prinsesa a rabia despues ku el a mira e lotgiter sakando potrèt di e residensia real serka di Champs Elysees, i tabata teme ku e imágennan ta wòrdu usá pa hasié daño dor ku e ta yu muhé di e monarka saudi i mitar ruman di e prens heredero Mohammed bin Salman.
El a bandoná Fransia despues di e insidente di sèptèmber 2016 i a wòrdu enhuisiá miéntras e tabata ousente.
Su abogado, Emmanuel Moyne, a kalifiká e veredikto komo ineksplikabel i a indiká ku e lo apelá esaki.
E lotgiter, Ashraf Eid a bisa ku e bodyguard a kibra su selular i oblig’é pa sunchi pia di e prinsesa durante e insidente di tres ora largu.
