MEXICO, AFP.- Ayera Mexico a risibí e promé kargamentu di vakuna kontra Covid-19, desaroyá pa e duo farmaseutiko Pfizer/BioNTech, asina e kansier mèksikano Marcelo Ebrard a anunsiá.
“E promé kargamentu di vakuna Pfizer BioNTech a yega Mexico”, asina e minister a anunsiá riba Twitter for di airopuerto internashonal di siudat di Mexico, kaminda el a bai pa risibí e kargamentu.
Mexico ta bira e promé pais latinoamerikano ku ta haña e vakuna kontra e Coronavirus nobo ku a kosta bida di 120 mil persona den e nashon di 129 mion di habitante.
Ebrard no a bisa kuantu dósis a yega ayera,
E kargamentu a yega for di Bèlgika den un avion di karga i a keda spera riba pista pa Ebrard i otro funshonarionan manera Hugo Lopez Gatelli, supsekretario di salú i responsabel di strategia kontra epidemia, asina AFP a konstatá.
Lo kuminsá vakuna awe djaweps i e lo konsentrá pa e personal médiko ku ta konfrontando e pandemia, den kual 1.3 mion di persona a resultá kontagiá na Mexico.
