TEL AVIV, ISRAEL, AFP.- E promé minister israelí Benjamin Netanyahu a primintí ku e lo restourá seguridat den e pais kompleto despues di un oumento den violensia ku a inkluí misilnan desde Libanon i Siria, i tambe dos morto djaluna.
E luna aki tabatin konfrontashonnan fuerte, tiroteonan, atakenan ku rakèt i un atake ku un outo den e pais.
E último víktimanan tabata un adolesente palestino i un mama britániko israelí ku a muri di herida di un atake arma na Wèst Bank kaminda su dos yunan a muri anteriormente.
Un dia despues ku polis israelí a drenta un sala di orashon di e moské al-Aqsa di Herusalèm, e terser sitio di mas sagrado di Islam, a tira mas ku 30 rakèt desde suela libanes riba Israel.
Ehérsito israelí a bisa ku e atake probablemente a keda ehekutá pa e movementu armá palestino Hamas.
