BARCELONA, AP.- Katalannan a protestá na fabor di independensia a kongregá na Barcelona djárason, algun siman promé ku e veredikto den un kousa kontra 12 lider ku a motivá e separashon aki.
E manifestantenan a yega for di tur parti di Catalonia pa un plasa den e siudat. Mayoria tabatin bandera òf kamisanan pa promové independensia.
11 di sèptèmber a marka e Guera di Independensia na Spaña di 1714. For di 2012, esaki a kombertí den un dia di protesta masivo pa e movementu independista.
Polis di Barcelona a bisa ku mas o ménos 600.000 persona a yega pa e evento.
Enkuesta i resultadonan elektoral resien ta mustra ku 7,5 mion habitante den e region ta dividí entre esnan ku ta faboresé i esnan ku ta oponé kontra e separashon for di sobrá parti di Spaña.
E presidente interino di Spaña Pedro Sanchez, a purba aliviá e tenshonnan ku Catalonia desde ku el a okupá su puesto aña pasá.
Na aña 2017 tabatin un intento di separashon pero esaki a frakasá i 12 lider relashoná ku esaki ta wardando riba nan veredikto di Korte Supremo pa kargonan ku ta inkluí rebelion. Si nan keda deklará kulpabel, nan lo enfrentá vários aña den prizòn, pero un sentensia severo kasi sigur lo kousa protestanan públiko na Catalonia.
