MADRID, AP.- E presidente reiterá di Catalonia a primintí djamars ku e lo prolongá e lucha pa independensia den e region spañó.
E komentarionan di Carles Puigdemont a tuma lugá den un akto na Bruselas kaminda 200 alkalde di Catalonia a asistí, kende a saludá e lider ku gritu di “presidente” i “libertat”.
E alkaldenan a subi nan bastonnan, kual ta un símbolo di poder den Spaña, na final di su diskurso i esnan ku a kongregá a kanta e himno katalan.
“Nos no ta renunsia e ideal di un pais, e noshon di demokrasia”, asina Puigdemont a bisa na alkaldenan, reuní den un museo di arte den sentro di Bruselas.
Kompañá pa kuater kolaborador kua Sali di Spaña kuné, Puigdemont a reta outoridat di Spaña i e komunidat internashonal pa aseptá e resultadonan di un elekshon adelantá den Catalonia dia 21 di desèmber si separatistanan gana.
Puigdemont a hasi un petishon pa Union Europeo skucha tokante e asuntu aki. funshonarionan katalan den e evento na Bruselas a pidi lidernan di UE pa adoptá e kousa katalan.
E lidernan di e institushonnan prinsipal di UE ta aliado di e presidente di gobièrnu spañó Mariano Rajoy. Nan a ninga di kritiká su gobièrnu i a reakshoná ku hopi koutela riba e violensia polisial durante e referèndem di promé di òktober na Catalonia.
Anteriormente Puigdemont a duna un entrevista desde Bruselas ku e radio públiko katalan.
E lider separatista a bisa ku tin un “deskonekshon apsoluto entre e bienestar di e pueblo i elitenan europeo”, i ku e problema di Catalonia ta “un asuntu di derechi humano i di demokrasia, ku ta rekerí atenshon máksimo”.
