NEW YORK, AP.- Qualcomm a redusí su pronóstikonan di ganashi despues di anunsiá ku Apple ta ningando di paga pa teknologia usa riba iPhone.
E akshonnan di Qualcomm a baha na su nivel mas abou den 2017.
Apple Inc., a demandá Qualcomm un temporada pasa, akusando esaki di abusá di su kòntròl riba sierto teknologia i di kobra eksesivamente pa lisensianan di uso. Qualcomm a bisa djabièrnè ku Apple a avisá ku e lo no paga mas lisensia te ora ku resolvé e disputanan. Apple a konfirmá ku esaki a suspendé su pagonan te ora ku tribunal determiná kiko esakinan debe.
“Nos a purba yega na un akuerdo di lisensia pa mas di sinku aña pero Qualcomm a ninga di yega na un kontrakt hustu”, segun Apple. “Manera nos a bisa anteriormente, e eksigensianan di Qualcomm no ta rasonabel i tabata kobrando nos eksesivamente pa algu ku ta nos propio inovashon, no di nan”.
Qualcomm a bisa ku e lo sigui defendé su mes ku intenshon di “risibí un preis hustu pa nos aportenan teknológiko den e industria”.
Sin embargo, e efekto di finansa di Qualcomm por a wòrdu mirá mesora, kual su akshonnan a pèrdè 15% di su balor for di momentu ku Apple a presentá su demanda den yanüari.
