LONDON, REINO UNI, AFP.- Reino Uní a outorisá uso di e vakuna di COVID-19 desaroyá pa AstraZeneca/Oxford. E pais ta spera di por aselerá su lucha kontra e pandemia ku e aprobashon aki.
Djamars e pais a registrá 53.135 kaso, di kual mayoria ta e variante nobo i muchu mas kontagioso i deskubrí dies dia pasa den e pais, segun indikashon di e minister di Salú, Matt Hancock. El a agregá ku servisionan di salú ta bou di preshon fuerte ku mas di 21.000 persona hospitalisá. Esaki a superá e olanan di mas pió registrá den e aprel.
Un di e paisnan mas afektá den Europa ta Reino Uní ku kasi 72.000 morto konfirmá pa COVID-19.
Outoridat ta sospecha ku e ola nobo aki ta debí na e variante nobo, ku ta entre 40% i 70% mas kontagioso ku esnan anterior. E gobièrnu di Boris Johnson ta bou di preshon fuerte pa reforsá restrikshonnan pa kombatí e pandemia.
