LONDON, AFP.- E diputadonan britániko a aprobá ayera ku un gran mayoria e tratado komersial posbrexit entre London i Bruselas, firmá algun ora promé pe lidernan oropeo na vispera di un separashon históriko ku ta pone fin na kasi 50 aña di relashon.
E teksto ku ta skibi den e akuerdo komersial den e legislashon britániko a keda aprobá ku 521 voto kontra di 73 den e kámara di komun promé di a pasa pa kámara di Lores kendenan mester vota tambe durante atardi. Kualke eventual enmienda mester keda konfirmá pa e diputadonan promé ku Reina Isabel II firma esaki.
Ku e lei aki nos lo bira bisiñanan amistoso, e mihó amigu i aliado ku Union Oropeo por tin, esaki segun promé minister britániko Boris Johnson dilanti di diputadonan.
Alkansando 24 di desèmber, na un siman promé ku fin di aña e periodo di transishon posbrexit, e tratado di komersio liber entre reino Uni i e 27 nan ta drenta na vigor awe 31 di desèmber pa 11 or di anochi.
Un dia promé, e presidentenan di komishon oropeo, Ursula von der Leyen i e konseho oropeo Charles Michel a firma e teksto di mas di 1200 página den un seremonia breve na Bruselas.
