PARIS, FRANSIA, AFP.- Algun doño di restorantnan franses a habri nan establesimentu simbólikamente djaluna pa defendé nan derechi di traha, apesar ku gobièrnu a menasá di anulá nan yudansa finansiero komo konsekuensia di e akto aki.
Un chef di Besancon a anunsiá ku e lo habri su establesimentu djaluna 1e di febrüari i a pidi su koleganan pa hasi meskos.
Un otro chef, Stephan Turillon a afirmá ku e kier “inisiá un diálogo” ku Estado. “No por kombatí e pandemia serando tur kos”,, asina el a bisa na AFP.
E minister di Ekonomia Bruno Le Marie a alerta djaluna ku barnan i restorantnan ku habri lo keda sin haña yudansa di e fondo di solidaridat di Estado durante un luna largu.
Tur restorant i otro negoshinan ku a sera komo kousa di e pandemia por opta pa haña 10.000 euro pa luna òf un kompensashon di 20% di nan entrada, pero ku un máksimo di 200.000 euro pa luna. Restorantnan ta sera desde 30 di òktober na Fransia i por bende kuminda solamente pa bai kuné.
