RUSIA, AFP.- E komité di investigashon ruso a anunsiá nan intenshon di investigá algun komentario ku un rèper ruso a hasi resientemente, akusá di a insultá e memoria di e veteranonan di e di dos guera mundial.
E rèper Alicher Morgenshtern di 23 aña a deklará den un entrevista riba Youtube ku e no ta komprondé dikon Rusia ta selebrá e viktoria riba e nazinan kada 9 di mei siendo esaki a sosodé 76 aña pasá.
E deklarashonnan aki a indigná algun kombatiente di ántes kendenan a presentá un denunsia na e komishon di investigashon, akusando e rèper di a insultá e memoria históriko di e defensornan di patria, kendenan a kombatí i a muri entre 1941 i 1945, asina e organismo ta splika den un komunikado.
E presidente di e komishon di investigashon, Alexander Bastrykin a ordená investigá e deklarashonnan di e rèper pa establesé si el a kometé un violashon di e lei ruso riba insultá den públiko e memoria di e defensornan di Patria i e rehabilitashon di e nazista.
