MOSKU, RUSIA, AFP.- Rusia ta tumando medidanan pa minimalisá e impakto di e embargo riba su petroli akordá pa Union Oropeo a base di e guera na Ukrania, asina Kremlin a sigurá.
“E sanshonnan aki lo tin un impakto negativo pa Oropa, nos i pa e merkado energétiko mundial. Pero tin un reorientashon di ekonomia ruso ku ta permití nos minimalisá e konsekuensianan negativo”, asina Dmitri Peskov, e bosero di Kremlin a bisa.
E dirigentenan di Union Oropeo a bai di akuerdo djaluna pa un embargo parsial di e importashonnan di petroli ruso promé ku aña kaba. Bruselas a konfia a priva Rusia di un parti di su entradanan ku ta permití finansiá e guera na Ukrania.
E medida ta forma parti di un pakete di sanshon oropeo, e di seis, ku tambe ta inkluí e eksklushon di e sistema SWIFT di tres banko ruso. Segun un artíkulo publiká e siman aki na Wall Street Journal, e miembronan di e organisashon di paisnan eksportadó di petroli OPEP ta kontemplá pa ekskluí Rusia di e plan di produkshon ku a disidí aña pasá yüli huntu ku nan aliadonan di e grupo OPEP+.
Esaki lo permití pa paisnan manera Arabia Saudita ku ainda ta den proseso pa oumentá nan produkshon, por hasié.
E minister ruso di relashonnan eksterior Serguie Lavrov a bisa durante di un bishita na Riad ku Rusia ta deseá di sigui kooperá den e kuadro di OPEP+. ‘Nos a papia di e tema, pero solamente den e konteksto di konfirmashon di e akuerdonan di kooperashon ku OPEP+ ya alkansá i konfirmá den vários okashon pa nos dirigentenan”, asina Lavrov a bisa. “E prinsipionan di kooperashon segun e base ta sigui vigente i tambe ta sigui di ta importante”, asina el a enfatisá.
