FAIRFAX, MERKA, AFP.- Un hurado na Merka a konkluí ayera ku Johnny Depp i Amber Heard a difamá un pa ku otro pero a bai na fabor di e strea di Pirates òf the Caribbean den un huisio pa difamashon ku a inkluí akusashonnan kontroversial di agreshon seksual i violensia doméstiko.
Depp kende a pèrdè un kaso na 2020 kontra e korant The Sun ku a akus’é di ta dal muhé, a selebrá e veredikto dividí komo un viktoria i a bisa ku e hurado a dun’é bida bèk.
Komponé pa 5 hende hòmber i 2 hende muhé e hurado a deliberá durante tres dia promé di a dikta sentensia ku Heard a difamá Depp den un artíkulo di opinion pa kual e tin di page 10 mion dòler pa e konsepto di indemnisashon i 5 mion pa daño perhuisio.
Na mes momentu a konsiderá ku Depp di 58 aña tambe a difamá su èks kasá di 36 aña kende el a otorgá un kompensashon muchu ménos di 2 mion dòler.
“Awe mi ta sinti mi desepshoná i sin palabra. Mi ta deskonsolá pasobra e seru di evidensia no tabata sufisiente pa enfrentá e poder i e influensia desproporshonal di mi eks kada”, asina el a skibi den un komunikado despues di a haña e desishon di korte.
