WASHINGTON, AP.- Presidente di Kámara di Representante, republikano Paul Ryan, a bisa djárason ku e proposishon di lei di inmigrashon “mester inkluí mas medida di seguridat”.
Durante su kampaña presidensial i desde e tempu ei, presidente Donald Trump a primintí ku e ta bai konstruí un muraya na frontera ku México. Ryan a bisa den un entrevista ku The Associated Press ku e muraya no mester wòrdu konstruí na e frontera kompleto, argumentando ku “e sirkunstansianan riba e tereno lo diktá kon seguridat na frontera ta wòrdu implementá”.
Ryan a bisa ku Trump a adoptá e focus apropiá dor di ordená eliminashon di un programa ku ta protehá hóbennan migrante ku a yega desde mucha e pais.
El a bisa ku e kier pa Kas Blanku duna Kongreso mas tempu pa lidia ku e asuntu paso e no kier pa e programa “krea káos”. El a agregá ku e seis lunanan ku Trump a duna Kongreso pa tuma akshon ta sufisiente tempu.
Trump a anunsiá ku e lo desmantelá e programa konosí komo DACA den seis luna. E programa aki a proveé vários pèrmit di trabou i protekshon di deportashon na kasi 800.000 hóben inmigrante.
Ryan a bisa ku deportashon di e inmigrantenan protehá pa e programa “no ta benefisiá interes di nos nashon”.
E representante a bisa den un entrevista ku e ophetivo di legisladornan republikano ta pa aprobá un lei di reforma di impuesto “pa asina kuminsá ku un sistema nobo pa aña 2018”.