BERLIN, AP.- Polis a evakuá un parti di e aeropuerto mas transitá di Alemania despues ku un agente a permití entrada di un famia franses ku no a wòrdu revisá apropiadamente. Esaki tabata un eror.
Polis federal a interumpí tur buelo i a mantené pasaheronan for di e zona A di terminal 1 di e aeropuerto di Frankfurt durante dos ora. E medida a wòrdu tumá ku e argumento ku por lo ménos un persona a drenta sin pasa via kontròl di seguridat.
Polis a tweet ku e evakuashon di mèrdia tabata debí ku un agente a permití entrada di un famia franses di kuater persona den e zona di seguridat apesar ku nan mester a wòrdu revisá un biaha mas.
E famia a wòrdu lokalisá, interogá i outorisá pa sigui ku nan biahe, segun indikashon di polis.
E terminal a reanudá su operashonnan normal dos ora despues di e evakuashon parsial.
Lufthansa, e aerolínea mas grandi di Alemania, a bisa ku e tardansa i kanselashonnan di buelo a afektá mas o ménos 7.000 pasahero i ku a reservá 2.000 kamber di hotèl, si akaso un pasahero no haña lugá riba vuelonan despues.
Algun buelo mester a sali sin pasahero pa asina logra yega na su destinashon na e orario programá.
E kosto di e insidente aki no a keda revelá.