GINEBRA, SUISA, AFP.- Suramérika ta “episentro nobo” di e pandemia di e Coronavirus nobo. Brazil ta e pais mas afektá, segun indikashon di Organisashon Mundial di Salú (OMS).
“Suramérika a kombertí den un episentro nobo di e enfermedat. Nos a mira e kantidat di kasonan oumentá den mayoria pais suramerikano”, segun deklarashon di e persona responsabel pa situashonnan di emergensia di OMS, Michael Ryan, den un telekonferensia desde Ginebra.
“Tin hopi preokupashon den e paisnan aki, pero esun mas afektá ta Brasil, segun indikashon di Ryan.
E pandemia di COVID-19 a mata mas di 20.000 persona na Brasil, segun e último konteo, ku un rèkòrt nobo di morto den 24 ora djaweps. E pais a registrá 1.188 morto e dia aki.
Brasil ya a registrá mas di 310.000 kaso, ounke ekspertonan ta sigurá ku e falta di tèst di diagnóstiko a impliká ku kisas e sifra ta mas haltu. E kantidat di morto a dupliká den 11 dia, segun dato di e ministerio.
