BERLIN, ALEMANIA, AFP.- E Komishon di vakunashon aleman a deskonsehá e vakuna di AstraZeneca pa tur esnan riba 65 aña. Esaki ta un kontratempu pa e laboratorio britániko, bou di preshon pa tardansa ku su suministro.
Aktualmente, “e vakuna di COVID-19 di AstraZeneca ta rekomendá solamente pa esnan entre 18 i 64 aña”, segun indikashon di e komishon di vakunashon (STIKO) den un dokumento. E rekomendashon aki ta pa falta di prueba pa esnan ansiano.
E empresa britániko AstraZeneca i promé minister Boris Jonson a defendé efikasia di e vakuna di COVID-19 desaroyá huntu ku Universidat di Oxford.
Un bosero di e laboratorio a bisa ku “último análisisnan ta respaldá e hipótesis di efikasia di e vakuna den esnan riba 65 aña” i a afirmá ku ta wardando riba Agensia Europeo di Medikamentu pa aprobá su uso den e próksimo dianan.
70% di e dósisnan atministrá aktualmente ta den paisnan riku (Europa, Merka i paisnan den Golfo) pero niun programa masivo di vakunashon a kuminsá den paisnan pober.
E pandemia a kousa por lo ménos 2,17 mion moro i infektá mas di 100,8 mion persona desde fin di desèmber 2019, segun un konteo di AFP djabièrnè.
