ME SAI, TAILANDIA, AP.- Ekiponan di reskate a lokalisá 12 mucha di un ekipo di futbòl i nan entrenador na bida, despues di tabata pegá den un kueba parsialmente inundá na nort di Tailandia, mas di un siman despues di a pèrdè.
Narongsak Osatanakorn, gobernador di Chiang Rai, a bisa ku e 13 sobrebibientenan tabata den e proseso di wòrdu reskatá, pero a atvertí ku ainda nan no tabata for di peliger.
“Nos no a logra saka nan, pero nan ta safe. Ainda e operashon no a terminá”, asina e gobernador a bisa den komentarionan na televishon nashonal, den referensia na e proseso kompliká pa saka nan di e sitio kaminda nan ta.
Famianan di e personanan pèrdí a brasa otro miéntras nan tabata selebrá e bon notisianan.
Aisha Wiboonrungrueng, mama di un di e muchanan, Chanin Wiboonrungrueng, di 11 aña, a smail i brasa su famia. El a bisa ku na momentu ku su yu regresá kas e lo kushina su kuminda preferí.
Ekiponan di reskate a pasa gran parti di djaluna preparando pa un último esfuerso i asina lokalisá e menornan di entre 11 i 16 aña i su entrenadó di 25 aña. E muchanan a pèrdè despues ku un inundashon a laga nan pega den e kueba Tham Luang Nang Non na Chiang Rai dia 23 di yüni.
Narongsak a bisa ku ekiponan di reskate a lokalisá e víktimanan 300-400 meter mas leu di e sekshon di e kueba ku tabata riba tereno haltu i no plat, kaminda posiblemente e muchanan i nan entrenadó a refugiá.
