MAE SAI, TAILANDIA, AP.- Awaseru pronostiká pa e próksimo dianan na nort di Tailandia por hasi e inundashonnan den e kueba mas grave. Akinan tin diesdos menor di edat i nan entrenadó di futbòl pegá, wardando pa wòrdu reskatá. Probablemente nan lo mester sali landando for di e kueba.
E diestres víktimanan, kende ta pegá den e kueba desde 23 di yüni debí na e nivel di awa haltu, a wòrdu lokalisá pa sambuyadónan di ekiponan di reskate djaluna anochi den e kueba ku ta keda den e provinsia na nort di Chiang Rai. Ta trata di un búskeda desesperá di parti di ekiponan internashonal i kual a kousa angustia den e pais.
E muchanan di entre 11 i 16 aña di edat, i e entrenadó di 25 aña, ta safe i ta wòrdu atendé pa shete miembro di Armada di Tailandia, inkluyendo dòkternan, kende ta huntu ku e víktimanan den e kueba. E salú di e muchanan i nan entrenadó ta stabil i ademas nan a haña bibidanan ku kontenido haltu di proteina.
Ounke labornan pa pòmp e awa saka tabata kontinuá, ta evidente ku algun parti di e kueba si no por pòmp i saka awa afó, konforme informashon di e minister di Interior Anupong Paojida. Pa e víktimanan por wòrdu reskatá promé ku áwaseru fuerte, posiblemente nan mester di ekipo pa sambuyá i lo haña asistensia di sambuyadónan profeshonal, segun e minister a agregá.
