PHILIPSBURGH,– Den fin di siman tras di lomba un tata a heridá su yu hòmber na altura di su brasa, despues di a los un tiru riba dje. Esaki a sosodé despues di un diskushon fuerte ku nan tabatin. Polisnan mesora a akudí na e sitio despues di a risibí e yamada. Na momento ku outoridatnan a yega ya kaba e víktima a keda trasladá pa Sint Maarten Medical Center pa tratamentu médiko.
Einan e hóben a deklará na reshèrshi ku su tata a tir’e durante un diskushon ku nan tabatin. Polisnan a laga sera e lugá di insidente pa asina haña chèns di konfiská evidensia nan ku por sirbi pa e investigashon. Reshèrshinan a interogá basta testigu ku tabata na e sitio. E tata akusado a entrega su mes boluntariamente na polis i a deklará ku ta e yu a menas’é promé ku un pistol. E akusado a keda arestá i polisnan a konfiská e arma di kandela pa mas investigashon. Te ainda no ta muchu kla pa polisnan kiko a pasa eksaktamente.
